ShQO-da 3 adamnyń koronavırýs juqtyrǵany tekserýler barysynda anyqtalǵan
ÓSKEMEN. QazAqparat – Shyǵys Qazaqstan oblysynda búgin saǵat 09:50-degi jaǵdaı boıynsha 3 adamnyń koronavırýs juqtyryp alǵany málim boldy.
Qaýipti ınfektsııany Semeı qalasynyń eki turǵyny juqtyrǵan. Atap aıtqanda, aýrýhadan tys jaǵdaıda pnevmonııamen aýyrǵan 1984 jylǵy áıel adamnan alynǵan skrınıngtik PTR testileý nátıjesi onyń koronavırýsty juqtyrǵanyn kórsetti, dep habarlaıdy Tótenshe jaǵdaı rejımin qamtamasyz etý jónindegi Memlekettik komıssııanyń Jedel shtaby.
Kelesi naýqas 1972 jylǵy áıel adam, onyń koronavırýs ınfektsııasyn juqtyrǵany profılaktıkalyq tekserý barysynda anyqtaldy.⠀
Vırýsty juqtyrǵan úshinshi adam Óskemen qalasynyń 1949 jylǵy turǵyny. Algorıtmge sáıkes COVID-19-ǵa 21 sáýir kúni koronavırýs rastalǵan naýqaspen baılanysta bolǵan adam retinde tekserildi. PTR taldaý nátıjesi bul áıeldiń de vırýs juqtyrǵanyn kórsetti.⠀
Qazirgi ýaqytta olar juqpaly aýrýlar statsıonaryna oqshaýlanyp, qajetti em qabyldap jatyr. Olarmen baılanysta bolǵan azamattardy anyqtaý jáne oqshaýlaý boıynsha epıdemıologııalyq tekserý sharalary kúsheıtilip, qarqyndy túrde júrgizilýde.⠀
Aldyn ala málimetterge súıensek, úsh jańa jaǵdaı boıynsha 6 oshaq anyqtalǵan. 33 baılanysta bolǵan adam tirkelgen. Onyń ishinde, jaqyn baılanys jasaǵandar sany - 18, baılanys jasaýy yqtımal jandar sany -15.⠀
Jalpy, oblys boıynsha koronavırýs juqtyrǵan - 15, jazylyp shyqqan 5 adam bar.
