ShQO-da 28 aýyl ishimdikten bas tartty
ÓSKEMEN. KAZINFORM – Shyǵys Qazaqstan oblysynda ishimdikten bas tartqan aýyldar sany 28-ge jetti.
ShQO Polıtsııa departamenti baspasóz qyzmetiniń málimetine súıensek, Tarbaǵataı aýdanyndaǵy Qamysty aýyly turǵyndary alkogol ónimderin tutynýdan bas tartý týraly sheshim qabyldady.
- Búginde aýylda 22 úı bar, onda 89 adam turady. Turǵyndar sanynyń azdyǵyna qaramastan, aýyl halqy qoǵamdyq ómirge belsendi aralasyp, óskeleń urpaqty tárbıeleýge, otbasylyq qundylyqtardy saqtaýǵa jáne qoǵamdaǵy qolaıly ahýaldy nyǵaıtýǵa erekshe kóńil bóledi. «Alkogolsiz aýyl» bastamasyna qosylý týraly sheshimdi jergilikti jurt erikti túrde jáne biraýyzdan qabyldady, - delingen aqparatta.
Aýyl halqy alkogolden bas tartý densaýlyqty nyǵaıtýǵa, jaýapkershilikti arttyrýǵa jáne balalar men jastardy tárbıeleýge qolaıly jaǵdaı jasaýǵa yqpal etetindigin jetkizdi.
Osylaısha, Qamysty aýyly osy bastamany qoldaǵan Shyǵys Qazaqstan oblysyndaǵy 28-shi eldi meken atandy.
Eske salsaq, osyǵan deıin Jambyl oblysynda 56 aýyl ishimdikten bas tartqany habarlanǵan.
