ShQO-da 25 metr tereńdiktegi shuńqyrǵa qulap ketken er adam aman qaldy

ÓSKEMEN. QazAqparat – Shyǵys Qazaqstan oblysynda 25 metr tereńdiktegi shuńqyrǵa qulap ketken er adam aman qaldy, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, oqıǵa 25 tamyzda Glýbokoe aýdanynda bolǵan.

«Aýdan ortalyǵynda shamamen túngi 01.00 shamasynda er adam tanysymen birge úıine qaıtyp kele jatqan. Kenet Ýshanov kóshesi aýmaǵyndaǵy shuńqyrdy baıqamaı, qulap ketti. Qasyndaǵy azamat birden qutqarýshylarǵa qońyraý shalǵan», - delingen aqparatta.

Kómekke TJD jedel qutqarý jasaǵynyń qyzmetkerleri shuǵyl kelip jetti. Olar 25 metr tereńdiktegi shuńqyrǵa túsip, 48 jastaǵy er adamdy alyp shyqty. Abyroı bolǵanda, ol aman qalǵan.

Qutqarýshylar jedel járdem feldsherimen birge aıaǵyn tańyp berip, alǵashqy medıtsınalyq kómek kórsetti. Sodan keıin ony medıtsına qyzmetkerleri aýrýhanaǵa alyp ketti.