ShQO-da 23 mekteptiń 169 synyby onlaın oqytý formatyna kóshirildi

ÓSKEMEN. KAZINFORM - Shyǵys Qazaqstan oblysynda juqpaly aýrýlardyń taralýyna baılanysty mektep oqýshylary qashyqtan oqý formatyna kóshirilip jatyr.

Bul týraly ShQO bilim basqarmasynyń baspasóz qyzmetinen málim etti.

- Maýsymdyq juqpaly aýrýlardyń kóbeıýine baılanysty óńirdegi 23 jalpy bilim beretin mekteptiń 169 synybyndaǵy 3015 oqýshy ýaqytsha qashyqtan oqytý formatyna aýystyryldy. Onyń ishindegi 1697-si bastaýysh synyp oqýshylary, - delingen aqparatta.

Atap aıtqanda, Óskemen qalasynyń 18 mektebindegi, Kúrshim aýdanynyń 3 mektebindegi, Ulan aýdanynyń 2 mektebindegi oqýshylar sabaqty onlaın oqyp jatyr.

- Onlaın formatqa ýaqytsha kóshý synyptaǵy oqýshylardyń 30%-dan astamy medıtsınalyq anyqtamamen dáleldengen sebeppen sabaqqa qatyspaǵan jaǵdaılarda júzege asyrylady. Bilim berý protsesi tolyq kólemde, qashyqtan oqytý talaptaryna sáıkes jalǵasyp jatyr, - delingen habarlamada.

Eske salsaq, osyǵan deıin Shyǵys Qazaqstan oblystyq bilim basqarmasynan bir synyp oqýshylarynyń qansha paıyzy aýyryp qalsa, sabaq onlaınǵa kóshiriletinin túsindirip bergeni habarlanǵan.