ShQO-da 23 mamyrdan bastap balabaqshalar jumysyn bastaıdy
ÓSKEMEN. QazAqparat – Shyǵys Qazaqstan oblysynda 23 mamyrdan bastap balabaqshalar men Halyqqa qyzmet kórsetý ortalyqtary óz jumysyn bastaıdy, dep habarlaıdy QazAqparat tilshisi.
Bul jaıly aımaq basshysy Danıal Ahmetov óziniń Facebook-tegi paraqshasynda jazdy.
«ShQO elimiz boıynsha alǵashqylardyń biri bolyp, 16 mamyrda karantın sharalaryn jeńildetti. Qazirgi tańda óńirde koronavırýs jaǵdaıy turaqty. Ótken aptada tek Semeı qalasynda 1 naýqas tirkeldi. Al Óskemen men basqa aýdandarda indet juqtyrýdyń jańa jaǵdaılary joq. Bul bizge karantın sharalaryn jeńildetýdiń ekinshi kezeńine ótýge múmkindik berip otyr. Bekitilgen algorıtmge sáıkes, 23 mamyrdan bastap balabaqshalar men Halyqqa qyzmet kórsetý ortalyqtary óz jumysyn qaıta bastaıdy», - deıdi ákim.
Onyń aıtýynsha, oblys ishindegi avtobýs qozǵalysy qalpyna keltirilýde. Biraq ázirge Semeıge baratyn qoǵamdyq kólikter jolǵa shyqpaıdy.
«Qalypty ómirge qaıta oralý úshin eń aldymen, barlyq kásiporyndardyń, shaǵyn jáne orta bıznestiń jumysy qalpyna kelý kerektigin jáne turǵyndardyń ózderine qajetti deńgeıde aqsha tabýy qajettigin jaqsy túsinemin. Biz aımaq ekonomıkasyn qalpyna keltirý úshin kóp jumys isteýdemiz. Barlyq derlik ónerkásiptik kásiporyndar karantınge deıingi jumys rejımine kóshti. Jekemenshik obektilerdiń 65 paıyzy burynǵy qyzmetin bastady. Meıramhanalar, dámhanalar jáne basqa da tamaqtaný oryndary ashyldy. Biz ondaǵy sanıtarlyq normalardyń saqtalýyn qatań baqylaýdamyz», - deıdi Danıal Ahmetov.
Aımaq basshysynyń sózinshe, Chehııa, Frantsııa jáne Germanııa syndy elderde shekteýler alynǵan soń tıisti baqylaýdyń bolmaýy vırýstyń qaıta órshýine ákelip soqqan. Sondyqtan saqtyq sharalaryn esh ýaqytta umytpaǵan jón.
«23 mamyrdan bastap Óskemen qalasynyń turǵyndary Gornaıa Ýlbınka, Sibe kólderi men Buqtyrma sý qoımasyna demalysqa bara alady. Koronavırýske shaldyqqan sany kóbeıip ketpes úshin oblystyń sanıtarlyq-epıdemıologııalyq qyzmetiniń usynysy boıynsha 1 maýsymǵa deıin aýmaǵy 2000 sharty mertden asatyn oıyn-saýyq ortalyqtary, azyq-túliktik emes taýar satatyn saýda nysandary, úıirmeler men art-klýbtar jumys istemeıdi», - deıdi ákim.
