ShQO-da 21 jastaǵy medıtsına qyzmetkeri psıhotropty zattardy satyp kelgen
ÓSKEMEN. QazAqparat – Shyǵys Qazaqstan oblysynda medıtsına qyzmetkeri psıhotropty preparattardy satýmen aınalysqan, dep habarlaıdy QazAqparat.
Óskemen qalalyq Polıtsııa basqarmasynan málim etkendeı, «Dármek» jedel-aldyn alý sharasyn ótkizý barysynda qala aýmaǵynda psıhotropty preparattardy satýmen aınalysqan 1999 jyly týǵan azamat anyqtaldy.
21 jastaǵy jigit jekemenshik narkologııalyq klınıkalardyń birinde meıirger bolyp jumys istegen. Ol quramynda psıhotropty zattar bar preparattardy jasyryn urlap kelgen.
«Atalǵan fakti boıynsha QR Qylmystyq kodeksiniń 298-babyna sáıkes sotqa deıingi tergeý amaldary bastaldy (esirtki quraldaryn, psıhotroptyq zattardy, sol tektesterdi urlaý nemese qorqytyp alý). Osy qylmystyq óndiris boıynsha Psıhotroptyq zattarmen jumys isteý erejelerin buzǵany úshin uıymnyń psıhotroptyq preparattardy saqtaýǵa, esepke alýǵa, berýge jáne ótkizýge jaýapty laýazymdy tulǵasy QR Qylmystyq kodeksiniń 303-baby (esirtki, psıhotroptyq nemese ýly zattarmen jumys isteý erejelerin buzý) boıynsha jaýapkershilikke tartyldy», - dedi basqarmadan.
