ShQO-da 21 adamdy aldap, 101 mln teńge paıda kórgen alaıaq sottaldy

ÓSKEMEN. KAZINFORM – Shyǵys Qazaqstan oblysy Zaısan aýdanynda 21 adamdy aldap soqqan alaıaq 6 jarym jylǵa túrmege qamaldy.

Zaısan aýdandyq sotynda asa iri mólsherde alaıaqtyq jasaǵan adamǵa qatysty qylmystyq is qaraldy. Belgili bolǵandaı, ol tanystaryna «Damý» kásipkerlikti damytý baǵdarlamasy boıynsha qomaqty nesıe alatynyn, biraq soǵan aqsha quıý qajettigin aıtqan. Sol kezde alǵan aqshasyn eki ese qylyp qaıtaryp beretindigine sendirgen. 

— 2022 jyldyń sáýir aıynan bastap 2024 jyldyń naýryz aıyna deıin 21 adamnan jalpy mólsheri 101 563 988 teńge alǵan. Sot barysynda jábirlenýshiler aıyptalýshydan materıaldyq shyǵyndy óndirip berýdi jáne qatań jaza taǵaıyndaýdy surady. Sottalýshynyń asyraýynda kámeletke tolmaǵan eki balasynyń bolýy is boıynsha jazany jeńildetetin mán-jaı dep tanyldy, — dep habarlady ShQO sotynyń baspasóz qyzmetinen.

Sot sheshimimen Q. esimdi 6 jyl 6 aı merzimge bas bostandyǵynan aıyryldy. Jábirlenýshilerge keltirilgen materıaldyq shyǵyn tolyqtaı óndirildi. Úkim áli zańdy kúshine engen joq.

Eske salsaq, buǵan deıin Óskemende ózin ákimdik qyzmetkeri retinde tanystyryp, halyqty aldaǵan alaıaq sottaldy.