ShQO-da 20,3 mlrd teńgelik ınvestıtsııalyq jobaǵa kedergi bolǵan jer máselesi sheshildi
ASTANA. KAZINFORM – Ulan aýdanynda quny 20,3 mlrd teńge bolatyn ınvestıtsııalyq jobaǵa qatysty jer máselesindegi ákimshilik kedergi joıyldy.
Shyǵys Qazaqstan oblysy Ulan aýdanynyń prokýratýrasy Investorlardyń quqyqtaryn qorǵaý komıtetiniń úılestirýimen «Ulan» kólik-logıstıkalyq ortalyǵyn salý jónindegi ınvestıtsııalyq jobany iske asyryp jatqan «DTJ Commerce» JShS-nyń quqyǵyn qorǵady.
Jobanyń jalpy quny – 20,3 mlrd teńge. Qurylys jumystaryn 2027 jyly aıaqtaý josparlanǵan.
Investıtsııalyq jobany súıemeldeý aıasynda prokýratýra Qasym Qaısenov kentinde ornalasqan kólemi 0,27 gektar jer ýchaskesin berýden jergilikti atqarýshy organnyń bas tartýyna baılanysty máseleni qarady.
Prokýratýranyń bastamasymen ýákiletti memlekettik organdardyń ókilderi men mamandardyń qatysýymen komıssııalyq zerdeleý júrgizildi. Nátıjesinde buryn suratylǵan jer ýchaskesin qoldanystaǵy shekteýlerge baılanysty berý múmkin emestigi anyqtaldy. Sonymen qatar, prokýratýra ýákiletti organdarmen birlesip, nysandy ornalastyrýdyń balamaly nusqasyn ázirledi.
Júrgizilgen jumystardyń nátıjesinde ınvestorǵa jer zańnamasynyń talaptaryna sáıkes keletin kólemi 0,18 gektar balamaly jer ýchaskesi berildi. Qazirgi ýaqytta qajetti quqyq belgileıtin qujattardy rásimdelip jatyr.
Budan bólek, prokýratýranyń yqpalymen ınvestorǵa buryn berilgen jer ýchaskesin jalǵa alý merzimi uzartyldy. Bul ınvestıtsııalyq jobany iske asyrý barysynda týyndaýy múmkin táýekelderdiń aldyn alýǵa múmkindik berdi.
Qabyldanǵan sharalardyń nátıjesinde jer qatynastary salasyndaǵy ákimshilik kedergiler joıylyp, ınvestordyń quqyǵy qorǵaldy jáne ınvestıtsııalyq jobany negizsiz kidirissiz ári qaraı iske asyrýǵa jaǵdaı jasaldy.
Aıta ketelik Mańǵystaýda prokýratýra 1,3 mlrd teńgelik jobanyń jalǵasýyna yqpal etken edi.
