ShQO-da 2029 jylǵa deıin 650 myń týrıst kelmek, al ınfraqurylym áli jetilmegen

ÓSKEMEN. KAZINFORM – Shyǵys Qazaqstan oblysy eldiń týrıstik kartasyndaǵy óz ornyn nyǵaıtyp keledi.

Osy jyldyń alǵashqy toqsanynyń ózinde óńirge 100 myńǵa jýyq týrıst kelgen. Onyń 95 myńy — ishki týrıster. Bul ótken jylmen salystyrǵanda 27%-ǵa kóp. Alaıda oblysqa kelýge degen qyzyǵýshylyq artqanyna qaramastan, ınfraqurylym máseleleri áli de ózekti.

Qazirgi tańda týrıstik baǵyttarǵa aparatyn 168 shaqyrym jol jóndelip jatyr. Bul maqsatta shamamen 5 mlrd teńge bólingen. Soǵan qaramastan, halyq keı jerlerge kólikpen jete almaıdy. Sonyń biri - Rahman qaınarlary shıpajaıy.

«QazAvtoJol» UK» AQ ShQO fılıalynyń dırektory Nurbek Temirhanovtyń aıtýynsha, keler jyly bul másele tolyqtaı sheshiledi.

- Rahman qaınarlaryna baratyn 13 shaqyrymdyq jolǵa alǵash ret asfalt tóselmek. Buryn bul ýchaskede tek qıyrshyq tas bolatyn. Qazir sý ótkizý qubyrlary, drenaj júıesi salynyp jatyr. 20 tamyzdan bastap jol keńeıtiledi. Sol sebepti kólik qozǵalysy ýaqytsha shekteledi, - dedi ol.

Qazirgi tańda Rıdder, Altaı, Katonqaraǵaı jáne Shemonaıha baǵyttaryndaǵy respýblıkalyq mańyzy bar joldar jóndelip jatyr. Bul joldar týrıster úshin de, jergilikti jurt úshin de mańyzdy.

Joldan bólek óńirde ınternet máselesi bar. 136 demalys bazasynyń tek 79-y ǵana ınternetpen qamtylǵan. 357 aýyldyń ishinde tek 218-inde ınternet ustaıdy. Qalǵan 139 eldi meken ınternetke 2027 jylǵa deıin qosylmaq.

ShQO ákimdiginiń málimetinshe, 2029 jylǵa deıin aımaqtaǵy týrıster sanyn 650 myń adamǵa deıin arttyrý kózdelgen. Osy maqsatta «4E» ( Eco, Ethno, Event, Entertainment) tujyrymdamasy engizildi.

- Oblys iri mádenı jáne sporttyq sharalar arqyly týrızmdi damytyp keledi. Samar aýdanynda balyq aýlaý festıvali ótti. Katonqaraǵaıda «Altaı – túrki áleminiń altyn besigi» atty halyqaralyq festıval uıymdastyryldy. Ótken kúzde ótken «Shyǵys salbýryny» búrkitshiler festıvaline Qazaqstannyń ár óńirinen bólek Qytaı, Mońǵolııa, Reseı, Qyrǵyzstan jáne Vengrııadan 5 myńnan astam týrıst kelgen, - delingen aqparatta.

Eske salsaq, osyǵan deıin Týrızm salasyndaǵy negizgi kapıtalǵa salynǵan ınvestıtsııa kólemi 460 mlrd teńgeden asqany habarlanǵan.