ShQO-da 2026 jyly 630 myń gektarǵa aýyl sharýashylyǵy daqyldary egiledi

ÓSKEMEN. KAZINFORM — Egis alqaptaryn ártaraptandyrý baǵdarlamasy aıasynda aýyl sharýashylyǵy daqyldary 629,9 myń gektar jerge egilmek. Bul týraly AShM baspasóz qyzmeti habarlady. 

Óńirde kóktemgi dala jumystaryna daıyndyq qarqyndy júrgizilip jatyr.

Egis alqaptaryn ártaraptandyrý baǵdarlamasy aıasynda aýyl sharýashylyǵy daqyldary 629,9 myń gektar jerge egilmek.

Egis alqaptarynyń qurylymy azyq-túlik qaýipsizdigin qamtamasyz etý jáne salanyń tabystylyǵyn arttyrý mindetterin eskere otyryp qalyptastyrylǵan. Dándi jáne dándi-burshaqty daqyldar 254,2 myń gektar, bul jalpy alqaptyń 40 paıyzy. Onyń ishinde 170,7 myń gektar jerge bıdaı egiledi.

Maıly daqyldar 232,3 myń gektardy qamtıdy, onyń ishinde 213,1 myń gektary kúnbaǵysqa tıesili. Mal azyqtyq daqyldar 132 myń gektar. Kartopqa 7,3 myń gektar, al kókónis pen baqsha daqyldaryna 4,1 myń gektar bólingen.

Oblysta 16 myńnan astam aýyl sharýashylyǵy tehnıkasy bar. Egis jáne topyraq óńdeý tehnıkalarynyń daıyndyǵy 100 paıyzdy quraıdy.

Aýyl sharýashylyǵy taýaryn óndirýshilerdiń tuqymǵa degen qajettiligi 72 myń tonna. Onyń ishinde 56,8 myń tonnasy – dándi daqyldar, 7,3 myń tonnasy – maıly daqyldar, 2 myń tonnasy – mal azyqtyq daqyldar jáne 5,9 myń tonnasy – kartop tuqymy. Qazirgi ýaqytta sharýashylyqtar qajetti tuqymmen tolyq qamtamasyz etilgen.

Egis naýqanyn tabysty ótkizý úshin oblystyq bıýdjetten tuqym, mıneraldy tyńaıtqyshtar men ósimdikterdi qorǵaý quraldaryn satyp alýǵa, sondaı-aq sýarý sýyn jetkizý qyzmetiniń qunyn óteýge 4,1 mıllıard teńge qarastyrylǵan.

Topyraq qunarlylyǵyn arttyrý jónindegi jol kartasyna sáıkes, bıyl 60,8 myń tonna mıneraldy tyńaıtqysh satyp alý josparlanyp otyr.

Egis jumystaryn erte qarjylandyrý aıasynda 2025 jylǵy qazan aıynan 2026 jylǵy qańtar aıyna deıin 41 aýyl sharýashylyǵy taýaryn óndirýshilerge qarjy berildi.

Aıta ketelik ShQO-da maıly jáne jarmalyq daqyldar tuqymyn óńdeý zaýyty iske qosylatyny týraly jazǵan edik.