ShQO-da 2024 jyly qandaı jumystar atqarylady
2024 jyl Shyǵys Qazaqstanda Jol jyly dep jarııalanǵan bolatyn. Oblystaǵy avtokólik joldarynyń jalpy jelisi 5 265 shaqyrym. Onyń ishinde respýblıkalyq mańyzy bar 1238 shaqyrymy QR Indýstrııa jáne ınfraqurylymdyq damý mınıstrliginiń «QazAvtoJol» UK-ǵa qarasty. Olardyń jóndeý josparyn ShQO Jolaýshylar kóligi jáne avtomobıl joldary basqarmasy beıindi mınıstrlikpen birlesip pysyqtaıdy.
«Jol jylynda óńirde birinshi kezekte tranzıttik marshrýttarǵa, atap aıtqanda shekara mańyndaǵy aýdandar men týrıster qatynaıtyn joldarǵa basa nazar aýdarylmaq. Shyǵys Qazaqstannyń jergilikti turǵyndary men qonaqtarynyń joldardyń sapasyna qatysty syny oryndy. Óıtkeni bul aımaqtyń ımıdjine teris áser etedi. Jyl kóleminde joldardy jóndeý boıynsha, kirme joldardy qosa alǵanda aýqymdy is-sharalar josparlanyp otyr. Ol úshin qarjylandyrýdy eki esege ulǵaıtý kózdelip otyr», - dep habarlady oblys ákimdiginen.
ShQO ákimi Ermek Kósherbaev beıindi basqarmalardyń basshylarymen jáne aýdan, qala ákimderimen is-qımyl josparyn talqylap, árbir eldi meken boıynsha barlyq problemalyq ýchaskelerdiń tizimin jasaýǵa tapsyrma berdi.
«Aýdan ortalyqtary men tirek aýyldardaǵy joldar da nazardan tys qalmaıdy. Eldi mekenderdiń ishinde áleýmettik nysandarǵa, shyǵysqazaqstandyqtar jıi baratyn saýda jáne qyzmet kórsetý salasynyń obektilerine aparatyn joldar jóndeledi. Keshikpeı jumysqa kirisý úshin jobalyq-smetalyq qujattamany aldyn ala daıyndap, memlekettik satyp alýlardy erejelerge sáıkes júrgizý qajet. Quzyrly uıymdar men jurtshylyq jóndeý jumystarynyń sapasyn baqylap otyrýy tıis», - dedi aımaq basshysy.