ShQO-da 2022 jylǵa qaraı 9 stýdenttik jataqhana ashylady
ÓSKEMEN. QazAqparat - Bıyl qyrkúıek aıynda oqýshy oryndarynyń tapshylyǵyn azaıtý maqsatynda 2 mektep paıdalanýǵa beriledi. Bul týraly ShQO máslıhatynyń altynshy shaqyrylymynyń HL kezekti sessııasynda oblys basshysy Danıal Ahmetov aıtty, dep habarlaıdy QazAqparat tilshisi.
«Tótenshe jaǵdaı men karantındik sharalardyń engizilýi bilim júıesine áser etti. Oqýshylar men stýdentter qashyqtan oqytýǵa kóshti.
Qajetti jaǵdaı jasaý úshin biz 67 mıllıon teńgege 9,5 myń balaǵa ınternet-trafıgi joǵarylanǵan roýterler men uıaly baılanys operatorlarynyń paketterin satyp aldyq.
Jańa oqý jyly bastalmaı turyp, jalpy bilim berý qorynda únemdelgen qarajat esebinen stýdentter men oqytýshylardy 100% kompıýterlik tehnıkamen qamtamasyz etý úshin 8 myń noýtbýk satyp alynady», - dep atap ótti ShQO ákimi.
Onyń aıtýynsha, bıyl qyrkúıek aıynda oqýshy oryndarynyń tapshylyǵyn azaıtý maqsatynda 2 mektep paıdalanýǵa beriledi (Abaı aýdany, Qaraaýyl aýylynda 300 oryndyq jáne Óskemen qalasy Ahmırovo aýylyndaǵy 1000 oryndyq mektep).
«Orta kásiptik bilim berý salasynda «Jas maman» jobasyn júzege asyrý jalǵasýda. Onyń aıasynda tanymal kásipterdegi 10 kolledj jańǵyrtylyp, zamanaýı qural-jabdyqtarmen jaraqtandyrylady.
Joǵary bilim salasynda «Bilimdi maman» baǵdarlamasy boıynsha 4 jyl ishinde 1446 grant berildi. Jalpy, túlekterdiń sheteldik joǵary oqý oryndaryna ketýi 1800-den 535 adamǵa deıin 3,4 ese azaıdy«, - deıdi Danıal Ahmetov.
Sondaı-aq, oblysta «Elbasynyń bes áleýmettik bastamasy» aıasynda stýdent jastardyń ómir súrý jaǵdaılaryn jaqsartý boıynsha jumystar belsendi júrgizilýde.
«Bıýdjet esebinen Semeıde 700 oryndyq 2 jataqhana, sonymen qatar jeke qurylys salýshylar esebinen 211 oryndyq 2 jataqhana ashyldy. Barlyǵy 911 tósektik 4 jataqhana bar.
Aǵymdaǵy jyly 3 jataqhananyń qurylysy bastaldy. 2022 jylǵa qaraı 2,5 myń orynǵa arnalǵan 9 jataqhana ashý josparlanǵan», - deıdi oblys ákimi.
