ShQO-da 2021 jyldyń bes kúninde 8 kólik órtendi
ÓSKEMEN. QazAqparat – Shyǵys Qazaqstan oblysynda 2021 jyldyń bes kúninde 8 kólik órtendi, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 5 qańtarda Semeıde 3 kólikten órt shyqqan. Naqty aıtqanda, Rýdnaıa kóshesinde ornalasqan ekiqabatty turǵyn úıdiń aýlasyndaǵy garajdyń shatyryn, qabyrǵalaryn jáne sonyń ishindegi Toyota Sresta kóligin jalyn sharpyǵan. Sondaı-aq qala kóshelerinde Volkswagen Passat jáne Lada Kalına avtokólikteri órtendi.
Budan bólek, Aıagóz qalasyndaǵy jeke turǵyn úı mańyndaǵy garaj shatyrynyń aǵash qurylymdaryn jáne ishte turǵan 2016 jylǵy Subaru Forester kóligin órt shaldy.
«Jalyn sharpyǵan aýmaq 24 sharshy metrdi quraǵan. Órttiń shyǵý sebebi – qaýiptiligi joǵary agregatpen abaısyz jumys atqarýdan bolýy múmkin», - dep habarlady vedomstvo ókilderi.
TJD dereginshe, oblys boıynsha 2021 jyldyń bes kúninde 8 kólik órtengen.
