ShQO-da 200 balaǵa Prezıdent atynan jańajyldyq syılyq berildi
ÓSKEMEN. QazAqparat – Shyǵys Qazaqstan oblysynda 200 balaǵa Prezıdent atynan jańajyldyq syılyq berildi, dep habarlaıdy QazAqparat tilshisi.
Jańa jyl merekesi qarsańynda balalarǵa el Prezıdenti men oblys ákiminiń atynan syılyqtar tabys etildi. Epıdemıologııalyq jaǵdaıǵa baılanysty ekinshi jyl qatarynan jańajyldyq shyrsha kontsertsiz ótti.
Sharaǵa 9-13 jas aralyǵyndaǵy 450 bala qatysty. Onyń ishinde erekshe bilim alýdy qajet etetin balalar, az qamtylǵan jáne kópbalaly otbasylardan shyqqandar, oqýda ozat bolyp, sportta, shyǵarmashylyqta jetistikke jetken daryndy oqýshylar bar. 200 balaǵa Qasym-Jomart Toqaevtyń atynan, 250 balaǵa Danıal Ahmetovtiń atynan syılyq berildi.
«Syılyq alǵanyma óte qýanyshtymyn. Barlyq týǵan-týystarym men qurbylarymdy kele jatqan Jańa jyl merekesimen shyn júrekten quttyqtaımyn. Ańsaǵan armandaryńyzǵa jetińizder!», - dedi «Aq nıet» mektep-ınternatynyń on bir jasar oqýshysy Rıta Myshelovskaıa.
