ShQO-da 20 myńnan astam saýda ornynda azyq-túlik baǵasy tekserildi

ÓSKEMEN. QazAqparat – Shyǵys Qazaqstan oblysynda áleýmettik mańyzy bar azyq-túlik baǵasyn baqylaý úshin 20 myńnan astam saýda orny tekserilip, zań buzýdyń 504 faktisi anyqtaldy, dep habarlaıdy QazAqparat tilshisi.

Aımaq basshysy Danıal Ahmetov áleýmettik mańyzy bar azyq-túliktiń baǵasyn baqylaý máselesi boıynsha qala jáne aýdan ákimderimen jınalys ótkizdi.

«Arnaıy qurylǵan mobıldi toptar 20 myńnan astam saýda ornyn tekserdi. Sonyń nátıjesinde, zańdy buzýdyń 504 deregi anyqtalǵan. Bul baǵany jasandy kóterý jáne belgilengen saýda ústemesin saqtamaýǵa qatysty bolyp otyr», - dedi ol.

Oblys ákiminiń aıtýynsha, aýdandarda osy baǵyttaǵy jumys qalalarǵa qaraǵanda jaqsy júrgizilýde.

«Monıtorıngilik toptar jumysynyń algorıtmin túsindire keteıin. Olar azamattar aryz túsirgen jerlerge baryp tekserý jasaıdy. Zańdy buzý birinshi ret tirkelse – 10 AEK mólsherinde aıyppul salynady. Eger buzýshylyq qaıtalanǵan jaǵdaıda, ákimshilik aıyppul somasy 75 AEK-ke deıin kóteriledi. Osynyń arqasynda qazir baǵa turaqtanyp keledi. Azyq-túliktiń bes túriniń quny tómendetildi», - dedi Danıal Ahmetov.

Esterińizge sala ketsek, osyǵan deıin ShQO-da túrme qyzmetkerleri 20-dan astam muqtaj otbasyǵa azyq-túlik jetkizgenin habarlaǵan edik.