ShQO-da 20 gektarǵa jaıylǵan orman órti oqshaýlandy
ÓSKEMEN. KAZINFORM — Shyǵys Qazaqstan oblysynda Marqakól orman sharýashylyǵynda shyqqan órttiń beti qaıtaryldy.
ShQO tótenshe jaǵdaılar departamenti baspasóz qyzmetiniń málimetine súıensek, tilsiz jaý keshe Marqakól orman sharýashylyǵy aýmaǵynda shyqqan. Orman kúzeti men TJM bólimsheleri birden sol jerge baryp, jalyndy aýyzdyqtaýǵa kiristi.
— Órt jetýi qıyn jerdi sharpyǵan. Tilsiz jaýmen kúreske orman kúzeti men TJM-niń 85-ke jýyq qyzmetkeri, 10 tehnıka, «Qazavıalesoohrana» qyzmetkerleri jáne jeke quramdy jetkizý jáne jaǵdaıdy baqylaý úshin «Qazavıaqutqarý» AQ-nyń eki tikushaǵy jumyldyryldy, — delingen aqparatta.
7 qyrkúıekte tańerteń orman órti oqshaýlandy. Qyzyl jalynnyń jalpy aýmaǵy 19,4 gektardy qurady.
Eske salsaq, osyǵan deıin Jitiqaradaǵy dala órti aýyzdyqtalǵany habarlanǵan.
