ShQO-da 20-dan astam úıge qaýip tóngen Solovevo aýylynda sý deńgeıi túsýde
ÓSKEMEN. KAZINFORM – Shyǵys Qazaqstanda oblysy Altaı aýdanynda 20-dan astam úıge qaýip tóngen Solovevo aýylynda sý deńgeıi túsýde.
ShQO ákimi baspasóz qyzmetiniń málimetine súıensek, Solovevo aýylynda túngi ýaqytta sý deńgeıi kóterilip, 24 úıdi sý basý qaýpi tóngen. Oqıǵa ornyna jedel oblys ákimi Ermek Kósherbaev kelip, jaǵdaımen tanysty.
«Ákim jaǵalaýdy bógeý jáne erigen qar sýyn burý jumystarymen aınalysyp jatqan mamandarmen jáne turǵyndarmen kezdesti. Turǵyndar evakýatsııalaýdan bas tartyp, ýaqytsha týystarynyń úıine ornalasty. Eki kún qatarynan tolassyz jaýǵan jańbyr sebebinen kóterilgen sý deńgeıi qazirde 10-15 sm-ge tústi», - delingen aqparatta.
Oqıǵa ornynda jergilikti atqarýshy organ, Tótenshe jaǵdaılar departamentiniń mamandary kezekshilik uıymdastyrdy. Sondaı-aq polıtsııa beketi jumys istep tur.
