ShQO-da 2 jasar bala terezeden qulap ketti

ÓSKEMEN. QazAqparat – Shyǵys Qazaqstan oblysy Altaı aýdanynda ekinshi qabattaǵy páterdiń terezesinen qulap ketken 2 jasar bala aýrýhanaǵa jatqyzyldy, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetinshe, oqıǵa 9 mamyr kúni Altaı qalasynda bolǵan.

«2 jasar bala ekinshi qabattaǵy páterdiń terezesinen qulap ketken. Abyroı bolǵanda, búldirshin aman qaldy. Qazirgi ýaqytta ol aýrýhanaǵa jatqyzyldy. Oqıǵa ata-anasynyń balaǵa durys qaramaýy saldarynan boldy», - delingen aqparatta.

Sońǵy eki jylda oblys boıynsha 4 bala terezeden qulaǵan. Onyń ishinde eki jaǵdaı bıyl bolyp otyr.

Osy rette, qutqarýshylar kópqabatty úılerde bala terezeden qulamas úshin ne isteý kerektigin túsindirdi. Oqys oqıǵanyń aldyn alǵyńyz kelse:

- Balalardy qaraýsyz qaldyrmańyz.

- Páter terezelerine arnaıy qorǵanys quraldary qoıylýy tıis.

- Bala ózdiginen asha almaıtyndaı etip tereze tutqasyn qulyptańyz.

- Balanyń tereze aldyna shyǵýyna jol bermes úshin jıhazdyń barlyq túrin terezelerden alysqa qoıyńyz.

- Balany tereze aldyna shyǵaryp, kóshede ne bolyp jatqanyn kórsetýge úıretpeńiz. Ol siz joqta sony qaıtalaýy múmkin.

- Balalarǵa eresekterdiń qaraýynsyz balkonǵa shyǵýǵa ruqsat bermeńiz.