ShQO-da 2 mln-nan astam kóshet otyrǵyzylmaq
ÓSKEMEN. QazAqparat – Shyǵys Qazaqstan oblysynyń eldi mekenderine 2 mln-nan astam kóshet otyrǵyzylady, dep habarlaıdy QazAqparat tilshisi.
Aımaq basshysy Danıal Ahmetov Óskemendegi «Nurly Jol» jańa shaǵyn aýdanyna baryp, salynyp jatqan jer úılerdiń sapasyn tekserdi. Jýyq arada munda alǵashqy qonystanýshylar óz páterlerine kóshe bastaıdy.
«Baspanalar zamanaýı talaptarǵa saı turǵyzylǵan. Aýlaǵa kiretin joldary keń, 1 páterge 1,5 oryn shemasy boıynsha turaq oryndary qarastyrylǵan. Kásipkerlikpen aınalysatyndarǵa da jaǵdaı jasalyp otyr. Sonymen qatar jaqynda osy shaǵynaýdanda 600 oqýshyǵa arnalǵan mektep boı kóteredi», - dedi oblys ákimi.
Onyń aıtýynsha, merdiger «Nurly Jol» kompanııasy aýdandaǵy jumysyn odan ári jalǵastyrýǵa jáne ıpoteka arqyly beriletin úı salýǵa nıet bildirdi. Ákimdik qajetti ınjenerlik ınfraqurylymmen qamtamasyz etýge daıyn.
«Árıne, óńirdiń árbir shaǵyn aýdany jasyl jelekke kómkerilýi tıis. Bul týraly Prezıdentimiz Qasym-Jomart Kemeluly da aıtyp otyr. Aldaǵy jyldary oblystyń eldi mekenderine 2 mıllıonnan astam kóshet otyrǵyzamyz. Eń aldymen bul ıgi isti árkim óz aýlasynan bastaý kerek. Sonda aýdandarymyz ben qalalarymyz odan ári kórkeıedi», - dedi Danıal Ahmetov.
