ShQO-da 2 myńnan astam adamdy kene shaqty

ÓSKEMEN. KAZINFORM – Shyǵys Qazaqstan oblysynda kene shaqqandardyń ishinde 30 paıyzǵa jýyǵy – balalar. 

Óńirde kene shaǵýy saldarynan medıtsınalyq kómekke júgingenderdiń sany kún ótken saıyn artyp keledi.

— Sáýir aıynan bastap osy kúnge deıin 2300-den astam adamdy kene jaqty. Olardyń ishinde 14 jasqa deıingi balalardyń úlesi — 28 paıyz. Keneden zardap shekkenderdiń basym bóligine aldyn alý sharalary kórsetilip, sonyń ishinde vaktsınatsııa da júrgizilgen, — deıdi ShQO Sanıtarlyq-epıdemıologııalyq baqylaý departamentiniń basshysy Qanat Turdıev.

Búgingi tańda kene arqyly juǵatyn aýrýlarǵa shaldyqqandar bolǵan joq.

— Kenege qarsy ımmýnoglobýlın endemııalyq aımaqtardaǵy barlyq medıtsınalyq uıymda jetkilikti mólsherde bar. Oblys turǵyndaryna kenelerdiń adam ómirine qaýipti birqatar ınfektsııany tasymaldaıtynyn eskertemiz. Olardyń qataryna kene entsefalıti, kene rıkketsıozy, borrelıoz (Laım aýrýy) jatady. Sonymen qatar kene shaǵýy sozylmaly aýrýlardyń asqynýyna jáne allergııalyq reaktsııalarǵa sebep bolýy múmkin, — deıdi Qanat Turdıev.

Eske salsaq, osyǵan deıin Aqtóbede 50-den astam adamdy kene shaǵyp, dárigerge qaralǵany habarlanǵan.