ShQO-da 2 kólik soqtyǵysyp, bir adam kóz jumdy
ÓSKEMEN. QazAqparat – Shyǵys Qazaqstan oblysy Kókpekti aýdanynda eki kólik soqtyǵysyp, bir adam kóz jumdy, dep habarlaıdy QazAqparat tilshisi.
ShQO polıtsııa departamenti baspasóz qyzmetiniń málimetine súıensek, «ÝAZ» avtokóliginiń 58 jastaǵy júrgizýshisi mas kúıde rýlge otyryp, jyldamdyqty bekitilgen shekten asyryp jibergen.
Osynyń saldarynan ol qarsy jolaqqa shyǵyp ketip, «VAZ» kóligimen soqtyǵysty.
«VAZ» kóliginiń 66 jastaǵy júrgizýshisi oqıǵa ornynda qaza boldy. Al «ÝAZ» kóligin tizgindegen er adam keýde omyrtqasy synyp, aýdandyq aýrýhanaǵa jetkizildi. Atalǵan fakti boıynsha QR QK-niń 345-baby 3-bóligine (Kólik quraldaryn alkogoldik, esirtkilik nemese ýytqumarlyq masań kúıde basqaratyn tulǵalardyń abaısyzda adam ólimine ákep soqqan jol júrisi qaǵıdalaryn buzýy) sáıkes sotqa deıingi tergeý amaldary bastaldy», - dedi ShQO PD bastyǵy Saǵat Mádıev.
Qazirgi ýaqytta birqatar sot-medıtsınalyq saraptamalar taǵaıyndalǵan.
Sonyń nátıjesi boıynsha protsessýaldyq sheshim qabyldanady.
