ShQO-da 1982 jyly salynǵan mamandandyrylǵan medıtsınalyq ortalyq jóndeledi
ÓSKEMEN. QazAqparat – Shyǵys Qazaqstan oblystyq mamandandyrylǵan medıtsınalyq ortalyq jóndeýden ótedi, dep habarlaıdy QazAqparat tilshisi.
ShQO ákimi baspasóz qyzmetiniń málimetine súıensek, medıtsınalyq mekemeni zamanaýı tehnıkamen jabdyqtaý úshin sońǵy jyldary aýqymdy qarjy bólingen. Qazirgi ýaqytta munda robotohırýrgııa jáne transplantologııa ortalyqtary jumys istep tur.
Alaıda ortalyqtyń qabyldaý bólimi óte kúrdeli jaǵdaıda. Jobasy 1960 jyly jasalǵan aýrýhana 1982 jyly salynǵan.
«Medıtsınalyq mekeme ábden eskirip, tozyǵy jetken. Dálizderi óte tar, kabınetteri de shaǵyn ǵana. Jabdyqtary áli de tolyq emes, jóndeý kórmegenine kóp ýaqyt bolǵan. Biz osy olqylyqtyń ornyn toltyryp, bárin qalypqa keltirýge daıynbyz. Jóndeýge qajet 250 mıllıon teńgeni qyrkúıek aıynda bolatyn oblystyq máslıhattyń sessııasynda bólemiz», - dedi Danıal Ahmetov.
Óńir basshysynyń aıtýynsha, qabyldaý bólimin dárigerler úshin de, patsıentter úshin de yńǵaıly etip jasaý kerek. Ortalyqtyń qabyldaý bólimi kúnine 140-tan astam naýqasqa qyzmet kórsetedi.
Sonymen qatar mekemege shuǵyl dıagnostıka jasaýǵa qajetti tehnıka satyp alynbaq. Osylaısha, qabyldaý bólimi barlyq zamanaýı sapa standartyna saı bolady.
