ShQO-da 19 úıge sý kirip, turǵyndardyń mazasyn aldy
ÓSKEMEN. QazAqparat - Shyǵys Qazaqstandaǵy sý basqan úılerdiń sany 19-ǵa jetti, dep habarlaıdy QazAqparat tilshisi.
Buǵan deıin Shyǵys Qazaqstannyń birneshe aýdanynda ondaǵan aýlaǵa sý kirip, adamdar qaýipsiz orynǵa kóshirilgendigi týraly habarlaǵan bolatynbyz.
«Táýlik ishinde oblys boıynsha 19 úıdi, 61 aýla men 6 kósheni sý aldy. Tek Óskemenniń ózinde 13 jer úıge, 1 bes qabatty úıge sý kirgen» - deıdi tótenshe jaǵdaılar departamentiniń baspasóz qyzmeti.
Ázirge tasqynnyń zardaptaryn oblys ortalyǵy qatty shegip otyr. Jeke sektormen qosa qala kósheleri de kólkigen sýǵa toldy. Áleýmettik jelige taraǵan vıdeolardan Menovnoe kenti men 19 shaǵyn aýdannyń ortalyq kóshelerinde, Myza kóshesinde kólikterdiń «júzip» júrgenin kórýge bolady.
Qar eń kóp túsetin aýdandardyń biri sanalatyn Glýbokoe aýdanynyń eki birdeı eldi mekeni qarǵyn sýdan zardap shekti. Beloýsovka kentinde 4 úıdi, Jańa Úlbi eldi mekeninde 1 úıdi sý alǵan. Al Shemonaıha aýdanynda 33 úıdiń aýlasyna sý kirip, deńgeıi 20 santımetrge deıin jetken.
Tótenshe jaǵdaı mamandary sýdyń jolyn tosý úshin bir táýlik ishinde 61560 qumqap tósep, 3440 tekshme metr sý sorǵan. Olarǵa kómekke ulttyq ulan sarbazdary kómekke keldi. Osy jumystarǵa 36 tehnıka jumyldyrylǵan. Óskemendegi «Úlbi» áleýmettik qyzmet ortalǵyn panalaǵandar sany 3 adamǵa jetti.
