Jekege ótip ketken ShQTÝ tehnoparki memleketke qaıtaryldy

ÓSKEMEN. KAZINFORM – Óńirde tehnıkalyq sala mamandaryn (qurylysshylardan taý-ken metallýrgterine, hımıkter men baǵdarlamashylarǵa deıin) daıarlaıtyn, 60 jyldyq tarıhy bar (1968 jyly qurylǵan) memlekettik «D. Serikbaev atyndaǵy Shyǵys Qazaqstan tehnıkalyq ýnıversıteti» KEAQ-JOO qyzmetin atqarady. 

2008 jyly ýnıversıtet janynan «Altaı «Shyǵys Qazaqstan óńirlik tehnoparki» JShS quryldy, onyń mıssııasy — ınnovatsııalardy damytýdyń jańa baǵyttaryn ázirleý jáne engizý.

Tehnoparktegi qatysýshylardyń úlesin satyp alý jáne ıelikten shyǵarý boıynsha birqatar mámileniń nátıjesinde olardyń quramy ózgerdi.

Memleket aktıvterin básekelestik ortaǵa berý zańdylyǵyn taldaý arqyly ýnıversıtet múlkin jarǵylyq kapıtaldaǵy úlestermen aıla-sharǵy jasaý arqyly jeke sýbektige berý belgileri anyqtaldy.

— Aldyn ala tujyrymdar Tehnopark qyzmetindegi prokýrorlyq tekserý barysynda rastaldy, atap aıtqanda: 1,5 mlrd astam somaǵa múliktik zalal keltirý (ýnıversıtet úlesin azaıtý, sondaı-aq qarajatty alý jolymen), quny 1,4 mlrd memlekettik múlikti zańsyz kepilge salý, josyqsyz teń quryltaıshy tarapynan salyqtyq jeńildikterdi zańsyz qoldaný faktileri anyqtaldy, — delingen ShQO prokýratýrasy habarlamasynda.

Tekserý nátıjeleri boıynsha ýnıversıtettiń atyna qadaǵalaý aktisi engizildi, ony oryndaý sheńberinde memlekettik ýnıversıtet kepil sharttarynyń, sondaı-aq jarǵylyq kapıtal úlesin azaıtý týraly jınalystyń hattamalarynyń kúshin joıý týraly talap aryz berdi.

Prokýrorlar sotqa múddeli tulǵa retinde qatysty.

— Sot talqylaýlarynyń nátıjeleri boıynsha memlekettik múlikten barlyq aýyrtpalyq alynyp tastaldy, ýnıversıtetke úshinshi tulǵaǵa zańsyz berilgen Tehnoparktegi qatysý úlesiniń quny 535 mln 78,48%-y qaıtaryldy jáne Tehnoparktiń josyqsyz teń quryltaıshy aldyndaǵy 1,6 mlrd somasyndaǵy bereshegi joıyldy, — delingen habarlamada.

Tekserý materıaldary boıynsha ShQO boıynsha Ekonomıkalyq tergeý departamenti QK 195-baby boıynsha (aldaý nemese senimdi teris paıdalaný jolymen múliktik zalal keltirý) sotqa deıingi tergep-tekserýdi bastady. Tergeý júrgizilip jatyr.

Osylaısha, tehnoparktegi qatysý úlesiniń 100%-y memleketke qaıtaryldy, múlik aýyrtpalyqtan tolyǵymen bosatyldy. 

Aıta ketelik úsh jylda 1 trıllıon teńgeden astam qarjy qaıtarylǵan edi.