ShQO-da 175 adam órt qaýipsizdigin saqtamaǵany úshin jaýapqa tartyldy
ÓSKEMEN. QazAqparat – 12 sáýirden bastap Shyǵys Qazaqstan oblysynda órtke qaýipti maýsym bastaldy. Búgingi kúni 682 ga aýmaqta 31 qurǵaq shóptiń tutaný oqıǵasy boldy, dep habarlaıdy QazAqparat Shyǵys Qazaqstan oblysy Tótenshe jaǵdaılar departamentiniń baspasóz qyzmetine silteme jasap.
Ormandy-dalalyq órttiń aldyn alý maqsatynda ShQO TJD qyzmetkerleri turǵyndar arasynda qurǵaq shóptiń tutanýyn boldyrmaý úshin reıdter men nusqaýlar júrgizýde. TJD, jergilikti polıtsııa, orman sharýashylyǵy, jergilikti atqarýshy organ qyzmetkerleri qatarynan órt qaýipsizdigi talaptaryn saqtamaǵandardy anyqtaý úshin arnaıy mobıldi toptar quryldy. Oblysta jergilikti atqarýshy organdar qarajatynan qamtamasyz etiletin 85 órt beketi bar.
Kóbinese tutaný adamdardyń órt qaýipsizdi erejelerin saqtaýǵa nemquraılylyǵynan bolady.
ShQO TJD shópti tutatý men ot jaǵý faktileri «Ákimshilik quqyq buzýshylyq týraly» Qazaqstan Respýblıkasy Kodeksi boıynsha qaralatynyn eske salady. 336-bap: «Ónerkásiptik jáne turmystyq qaldyqtardy jınap qoıý qaǵıdalaryn buzý, kórsetilgen qaldyqtardy jaǵý kezinde atmosferalyq aýany qorǵaý jáne órt qaýipsizdigi jónindegi talaptardy saqtamaý – eskertý jasaýǵa nemese jeke tulǵalarǵa – úsh, laýazymdy adamdarǵa – jıyrma, shaǵyn kásipkerlik sýbektilerine nemese kommertsııalyq emes uıymdarǵa – qyryq, orta kásipkerlik sýbektilerine – jetpis, iri kásipkerlik sýbektilerine bir júz jıyrma aılyq eseptik kórsetkish mólsherinde aıyppul salýǵa ákep soǵady».
Sonymen qatar QR Qylmystyq Kodeksiniń 204-baby boıynsha abaısyzda jasap, iri zalal keltirip bótenniń múlkin joıý nemese buldirý júz AEK kóleminde nemese sol kólemde qoǵamdyq jumystardy qarastyrady.
Mobıldi toptar júrgizgen reıdter nátıjesinde Shyǵys Qazaqstanda 175 adam órt qaýipsizdigi erejelerin saqtamaǵany úshin ákimshilik jaýapqa tartyldy.
Tutanýdyń aldyn alý úshin kelesi talaptardy saqtańyz:
- Úı mańyn qurǵaq shóp pen janatyn turmystyq qaldyqtardan tazartyńyz;
- Óz ýchaskeńizde ot jaqpańyz;
- Ashyq otty qoldanýmen baılanysty elektrmen pisirý jáne basqa jumystardy júrgizý barysynda órt qaýipsizdigi erejeleri men normalaryn saqtańyz;
- Eldi mekender, kásiporyndar men uıymdar aýmaǵynda qurǵaq shóp pen janatyn qoqysty órtemeńiz;
- Temeki tuqylynyń arnaıy belgilengen jerge tastalǵanyn, onyń aıaǵyna deıin sóndirilgenin qadaǵalaǵyz;
- Balalarǵa sirińkemen oınýǵa ruqsat etpeńiz.
