ShQO-da 1700-ge jýyq adamdy kene shaqty
ShQO Sanıtarııalyq-epıdemıologııalyq baqylaý departamenti baspasóz qyzmetiniń málimetine súıensek, óńirde sáýir aıynda keneniń taralý maýsymy bastalǵan. Búginde barlyǵy 1698 adam keneden zardap shekti. Onyń ishinde 520-sy 14 jasqa deıingi bala.
Kene entsefalıtine shaldyqqan bir adam tirkeldi. Ol Óskemen qalasynda turatyn zeınetker. Birden aýrýhanaǵa jatqyzylǵan patsıent em qabyldaýda.
«Jyl saıyn Shyǵys Qazaqstan oblysynda keneden zardap shekkender sany respýblıka boıynsha eń joǵary bolyp qalyp otyr. Elimizde kene shaqqan oqıǵalardyń 35 paıyzy bizdiń óńirge tıesili. Aýrýdyń kópjyldyq dınamıkasyn saralaı kele, óńirde kene entsefalıtin juqtyrý jaǵdaılary maýsym-shilde (78 paıyz) aılarynda kóp bolatyndyǵyn kórip otyrmyz. Endemııalyq aýmaqtarda ornalasqan medıtsınalyq uıymdarda kene entsefalıtine qarsy ımmýnoglobýlınniń mólsheri jetkilikti», - deıdi basqarma basshysynyń orynbasary Sáýle Slıamǵazına.