ShQO-da 17 myńǵa jýyq oqýshy kompıýtermen qamtamasyz etildi
ÓSKEMEN. QazAqparat - Shyǵys Qazaqstan oblysynda oqýshylardy kompıýtermen qamtamasyz etý jumystary jalǵasýda, dep habarlaıdy QazAqparat tilshisi.
ShQO Aqparattyq ortalyǵynda ótken onlaın brıfıng barysynda oblystyq Bilim basqarmasynyń basshysy Saırangúl Jumadilova málim etkendeı, óńirdegi 22 476 balanyń úıinde kompıýterlik tehnıka tapshy. Onyń ishinde qashyqtan bilim alyp jatqan 16 904 oqýshy mektep kompıýterlerimen qamtamasyz etilgen. Qalǵan 5 712 bala shtattyq rejımde bilim alýda.
Onyń aıtýynsha, aýdandyq jáne qalalyq bilim bólimderiniń qarjylandyrýy arqyly 2 572 kompıýterlik tehnıka satyp alynǵan. Sondaı-aq, QR Úkimetiniń qorynan bólingen qarajat esebinen 26 509 kompıýter alyndy. Osy maqsatta 4,1 mlrd teńge bólindi.
«Memlekettik satyp alýdy ádil uıymdastyrý jáne kompıýterlik tehnıkalardy bólý maqsatynda «Adaldyq alańy» jobalyq keńsesi tóraǵasynyń jetekshiligimen, «Nur Otan» partııasynyń ókilderi, oblystyq maslıhat hatshysy, qoǵam ókilderi, jumyspen qamtý jáne áleýmettik qorǵaý basqarmalarynyń, balalardyń quqyqtaryn qorǵaý jónindegi jergilikti qoǵamdyq uıymdardyń, sondaı-aq qamqorshylyq keńesiniń, ata-analar qoǵamdastyǵynyń, jastar uıymdarynyń jetekshilerinen jumys toby qurylyp, jetkizýshi anyqtaldy. Qazirgi tańda kompıýterlik tehnıkalardy jetkizý jumystary bastalyp ketti. Osy baǵyttaǵy jumys 15 qyrkúıekke deıin aıaqtalatyn bolady», - dedi Saırangúl Jumadilova.
Sonymen qatar jumys toby kompıýterlik tehnıkany bólýge monıtorıng júrgizedi. Birinshi kezekte az qamtylǵan, kópbalaly otbasylar, erekshe qajettilikteri bar balalar jáne oqý ozattary qamtamasyz etilmek.
