ShQO-da 16 jastaǵy jasóspirim taǵy bir ǵımaratqa «bomba qoıdy»
ShQO Polıtsııa departamenti baspasóz qyzmetiniń málimetine súıensek, Ekstremızmge qarsy kúres basqarmasynyń qyzmetkerleri Semeı qalalyq polıtsııa basqarmasynyń saqshylarymen birlesip, terrorızm aktisi týraly jalǵan habarlama jasaǵan kúdiktini anyqtady.
«102 kanalyna qońyraý shalǵan belgisiz adam qala ákimdiginiń ǵımaratyna jarylǵysh zat qoıylǵandyǵyn aıtqan. Keshendi jedel-izdestirý sharalary barysynda polıtsııa kúdiktini qolǵa túsirdi. Ol Semeı qalasynyń 16 jastaǵy turǵyny bolyp shyqty», - delingen vedomstvo málimetinde.
Tergeý kezinde anyqtalǵandaı, jasóspirimniń osy syndy taǵy bir qylmysqa qatysy bar. Ol bıylǵy 8 tamyzda Shákárim dańǵylyndaǵy turǵyn úıde jáne saýda ortalyqtarynyń birinde bomba qoıylǵandyǵy týraly jalǵan SMS habarlama jibergen.
«Kámelettik jasqa tolmaǵan bala óz kinásin moıyndady. Atalǵan fakti sotqa deıingi tergeýdiń biryńǵaı tizilimine QR Qylmystyq kodeksiniń 273-baby (Terrorızm aktisi týraly kórineý jalǵan habarlaý) boıynsha tirkeldi. Tergeý amaldary jalǵasýda», - dedi ShQO PD bastyǵy Saǵat Mádıev.
