ShQO-da 150 kólik qar qursaýynda qaldy
ÓSKEMEN. KAZINFORM – Shyǵys Qazaqstan oblysynda polıtseıler qar qursaýynda qalǵan 150 kólikti alyp shyqty.
Óńirdegi qalyń qar men joldyń durys kórinbeýi jol qozǵalysyn aıtarlyqtaı qıyndatty.
Óskemen-Altaı, Óskemen-Rıdder jáne Óskemen-Semeı baǵyttarynda qozǵalys baıaýlap, keı jerlerde múlde toqtap qalǵan.
- Aýa raıynyń qolaısyzdyǵynda polıtseıler jolda qyzmet atqarýdy jalǵastyryp, júrgizýshilerge kómek kórsetip, qaýipsizdikti qamtamasyz etip jatyr. Bir kún ishinde ǵana tártip saqshylary qarǵa batyp qalǵan 10-nan astam júk kóligi men jeńil avtokólikke kómek kórsetken, - dep habarlady ShQO Polıtsııa departamentinen.
Eń kúrdeli jaǵdaı Gerasımovka aýylynyń mańynda bolǵan. Munda 150 avtokólik qar qursaýynda qalǵan.
- Patrýldik polıtsııa batalonynyń qyzmetkerleri jaǵdaıdy der kezinde baqylaýǵa alyp, júrgizýshilerge baǵyt-baǵdar berip, qaýipti ýchaskelerden ótýge kómektesti. Sonyń nátıjesinde avtokólikter kolonnasy qaýipti aımaqtan aman-esen ótkizilip, keptelis pen jol-kólik oqıǵalaryna jol berilmedi, - delingen aqparatta.
Eske salsaq, ShQO-da aýa raıynyń kúrt buzylýyna baılanysty erteńge deıin joldar jabylǵany habarlanǵan.