ShQO-da 15 jasar bozbala sýǵa batyp ketti
ÓSKEMEN. QazAqparat - Shyǵys Qazaqstan oblysy Shemonaıha aýdanynda jasóspirim sýǵa batyp ketti, dep habarlaıdy QazAqparat tilshisi.
Shyǵys Qazaqstan oblysy tótenshe jaǵdaılar departamenti baspasóz qyzmetiniń málimetine súıensek, qaıǵyly oqıǵa keshe Pervomaıka aýylynda bolǵan.
15 jastaǵy jasóspirim úsh dosymen birge Komsomol sý qoımasyna shomylýǵa kelgen.
Tereńge súńgip ketken ol qaıta júzip shyǵa almady.
«Batyp bara jatqan bozbalanyń dostary abdyrap, kómekke ata-analaryn shaqyrý úshin úılerine qaraı júgirgen. Muny estigen eresekter birden polıtsııaǵa habarlasty», - delingen habarlamada.
Oqıǵa ornyna kelip jetken ýchaskelik polıtsııa ınspektory jasóspirimniń denesin tapty.
