ShQO-da 15 úıge sý kirdi
ÓSKEMEN. QazAqparat - Shyǵys Qazaqstannyń Besqaraǵaı aýdanynda 2 úıdi sý basyp, 13 aýla búlindi, dep habarlaıdy QazAqparat tilshisi.
Aýdan ortalyǵy sanalatyn Besqaraǵaı aýylynda Kýlıkov kóline jaqyn úılerge qaýip tóngen. Aqpan aıynda ǵana ózen boıyndaǵy úılerdiń syrtynan ınertti materıal tóselgen bolatyn. Alaıda sý jer astynan shyǵyp, aýlalarǵa jaıylýda.
Qutqarýshylar 2 úıdiń turǵyndaryn qaýipsiz jerge kóshirgen. Budan bólek 13 úıdiń aýlasyna sý jaıylǵan. Tótenshe jaǵdaı qyzmetkerleri jaıylǵan sýdy sorǵytyp jatyr.
«Besqaraǵaılyq qutqarýshylarǵa Semeı qalasynan qosymsha jasaq kómekke keldi. Qazirdiń ózinde 25 000 tekshe metr sý soryldy. Kýlıkov kólinen shyqqan sýdy aýyldan shetkeri áketý jumystary júrip jatyr. Uzyndyǵy 150 metr bolatyn arna qazyldy. Óskemennen de Shyǵys óńirlik jedel aeroutqyr qutqarý jasaǵynyń toby attandy» - delingen tótenshe jaǵdaılar departamenti taratqan aqparatta.
Departament deregine sensek, Krıvnka, Semııar aýyldaryna Ertis ózeninen de qaýip tónýi múmkin. Qutqarýshylar saqtyq úshin erteń ózenniń atalmysh aýyldarǵa jaqyn bóliginde muz jarý jumystaryn júrgizbek.
