ShQO-da 15 sáýirden bastap aýdan ortalyqtarynda qosymsha shekteýler engizilmek

ÓSKEMEN. QazAqparat – Shyǵys Qazaqstan oblysyndaǵy aýdan ortalyqtarynda jáne Rıdder men Kýrchatov qalalarynda qosymsha shekteýler engiziledi, dep habarlaıdy QazAqparat tilshisi.

ShQO ákimdiginiń málimetine súıensek, qosymsha shekteýler 15 sáýir, saǵat 00:00-den bastalady. Onyń sozylý ýaqyty koronavırýs ınfektsııasynyń taralý jaǵdaıyna baılanysty ózgerýi múmkin. Óńirdegi barlyq aýdan ortalyqtary men Rıdder, Kýrchatov qalalarynda baqylaý-ótkizý pýnkti qoıylmaq.

Kúndizgi ýaqytta kólik qozǵalysy shektelse, túnde (21:00-den 05:00-ge deıin) júrýge tyıym salynady (qyzmettik jáne qoǵamdyq kólikterdi, arnaıy ruqsaty bar jeke kólikterdi qospaǵanda). Jeke kólikterden kúntizbeniń jup kúnderi, nómiri nóldi qosqanda tek jup sanyna aıaqtalǵandar, al taq kúnderi, kólik nómiri taq sanǵa aıaqtalǵandar ǵana júre alady.

«Sonymen qatar demalys, mereke kúnderi tek qana qyzmettik jáne qoǵamdyq kólikterge jolǵa shyǵýǵa ruqsat berilgen. Turǵyndar 09.00-den 18.00-ge deıin ruqsattama arqyly (dúkenge, dárihanaǵa, bankke, poshtaǵa barý úshin) dalaǵa shyǵa alady. Ruqsattama tek jeke kýálikpen birge jaramdy», - dep habarlady ákimdikten.