ShQO-da 14 jasar bala koronavırýs juqtyrǵan
SEMEI. QazAqparat – Shyǵys Qazaqstan oblysynda koronavırýsty juqtyrǵan besinshi adam Semeı qalasynyń turǵyny bolyp shyqty, dep habarlaıdy QazAqparat.
Aıta keteıik, búgin elimizdiń 3 oblysynda kornavırýs juqtyrýdyń 20 jaǵdaıy tirkelgendigi málim boldy. Onyń ishinde Shyǵys Qazaqstan oblysynan qaýipti vırýsty 1 adam juqtyrǵan bolatyn.
ShQO Densaýlyq saqtaý basqarmasynyń basshysy Іlııas Muhamedjannyń aıtýynsha, ol 2006 jyly týǵan Semeı qalasynyń turǵyny.
«Naýqas 30 naýryzdan bastap aýyrǵan. Boıyn álsizdik bılep, qurǵaq jótel paıda bolyp, dene qyzýy 38 gradýsqa deıin kóterilgen. 3 sáýir kúni oǵan rentgenografııalyq tekserý júrgizildi. Qorytyndysy boıynsha patsıentke «pnevmonııa» dıagnozy qoıylǵan. Algorıtm boıynsha ol COVID-19-ǵa da tekserildi. Alynǵan synama nátıjesi oń bolyp shyqty», - deıdi ol.
Juqpaly dertke shaldyqqan bala jáne onyń otbasy músheleri, jaqyn týystary basqa elge shyqpaǵan.
«Qazirgi ýaqytta naýqastyń jaǵdaıy ortasha. Onymen baılanysta bolǵan 51 adam anyqtalyp otyr. Olardyń barlyǵy oqshaýlandy. Patsıenttiń turǵylyqty jeri boıynsha dezınfektsııa jumystary júrgizildi», - deıdi Іlııas Muhamedjan.
