ShQO-da 1300 gektarǵa jaıylǵan dala órti tórt kúnnen keıin aýyzdyqtaldy
ÓSKEMEN. QazAqparat – Shyǵys Qazaqstan oblysy Kúrshim aýdanynda 1300 gektarǵa jaıylǵan dala órti tórt kúnnen keıin aýyzdyqtaldy, dep habarlaıdy QazAqparat tilshisi.
ShQO tótenshe jaǵdaılar departamenti baspasóz qyzmetiniń málimetine súıensek, 8 qazan kúni Kúrshim aýdanyndaǵy «Pýgachev» ormanshylyǵynda órt shyqqan.
Shópti sharpyǵan tilsiz jaýdyń jalpy aýdany – 1300 gektardy qurady.
«Órtti óshirýge TJD qyzmetkerleri, jergilikti atqarýshy organ ókilderi men ormanshylar tarapynan 260-tan astam adam jáne 30-ǵa jýyq tehnıka jumyldyrylǵan. Sondaı-aq ShQO ákimdiginiń eki «MI-8» tikushaǵy tartyldy. Jetýi qıyn taýly aımaq pen qatty jel qyzyl jalyndy sóndirýdi qıyndatty», - delingen aqparatta.
Barlyǵy áýeden 14 ret jalpy kólemi 35 tonna sý tógildi.
Desant kúshteri 8 tonna sý jetkizdi. Nátıjesinde órt 12 qazan kúni túski ýaqytta aýyzdyqtaldy.
