ShQO-da 13 jyl boıy Qazaqstan azamattyǵymen júrgen reseılik anyqtaldy

ÓSKEMEN. QazAqparat – Shyǵys Qazaqstan oblysynda 13 jyl boıy qos azamattyqpen júrgen er adam anyqtaldy, dep habarlaıdy QazAqparat tilshisi.

Oblystyq Polıtsııa departamenti baspasóz qyzmetiniń málimetine súıensek, kóshi-qon qyzmetiniń mamandary qos azamattyqtyń kezekti faktisin anyqtady. Borodýlıha aýdanynda turatyn 55 jastaǵy er adam Reseı Federatsııasynyń azamattyǵyn 2009 jyly alsa da, ol týraly kúni búginge deıin tis jarmaı kelgen. Osylaısha, kórshi eldiń azamaty 13 jyl boıy Qazaqstan aýmaǵyna kirgen kezde QR azamatynyń qujattaryn paıdalanýdy jalǵastyrǵan.

«Oǵan QR ÁQBtK-niń 496-baby 1-bóligi boıynsha 100 AEK mólsherinde aıyppul salyndy. Qazaqstan Respýblıkasy azamattyǵynan aıyrylǵan sheteldikten jeke kýáligi men pasporty tárkilendi», - deıdi oblystyq PD bastyǵynyń birinshi orynbasary Eldos Zakımov.

Aıta ketsek, jyl basynan beri Shyǵys Qazaqstanda azamattyq týraly zańnamany buzǵany úshin 40 adam ákimshilik jaýapkershilikke tartylǵan.