ShQO-da 13 eldi mekenge qaýip tóndirip turǵan muzdyq kólderge tikushaqpen barlaý jasaldy
ÓSKEMEN. KAZINFORM – Shyǵys Qazaqstan oblysynda 13 eldi mekenge qaýip tóndirip turǵan muzdyq kólderge tikushaqpen barlaý jasaldy.
ShQO Tótenshe jaǵdaılar departamenti baspasóz qyzmetiniń málimetine súıensek, «Qazseldenqorǵaý» mekemesiniń mamandary Buqtyrma, Berel, Sarymsaqty ózenderine, taýlardaǵy morenalyq kólderge aerovızýaldy baqylaý júrgizdi.
«Jyl saıyn qaýipsizdik maqsatynda sel qaýpin baqylaý úshin morenalyq kólder muzdan áli ashylmaǵan sátten bastap jáne olar tolyq ashylǵanǵa deıin barlaý júrgiziledi. Muzdyqtardyń kóbisin áli de qar basyp jatyr. Qar bıiktigi 0,5-ten 1,5 metrge deıin jetedi. Kólder basseınderi birtindep toltyrylyp kele jatqany baıqalady. Muzdyqtardyń qarqyndy erý belgileri joq», - deıdi «Qazseldenqorǵaý» mekemesi ShQ fılıalynyń basshysy Sovetbek Stanbekov.
Shyǵys Qazaqstan oblysynyń taýlaryndaǵy 144 morenalyq kól 13 eldi mekenge qaýip tóndiredi. Eń kóp morenalyq kól Zaısan, Katonqaraǵaı aýdandarynda jáne Rıdder qalasynda ornalasqan. Búgingi tańda oblys boıynsha jalpy jaǵdaı turaqty.
