ShQO-da 116 tirek aýyl kórkeıe túsedi

ÓSKEMEN. QazAqparat – Shyǵys Qazaqstan oblysynda bıyl aýyldardy damytý úshin 50-den astam joba júzege asyrylmaq, dep habarlaıdy QazAqparat tilshisi.

Qazaqstan kommýnıstik halyq partııasy Shyǵys Qazaqstan fılıaly «Aýyl - El besigi» jobasyn iske asyrýdy talqylaý boıynsha otyrys ótkizdi. Shara barysynda aýyl sharýashylyǵy salasyn damytý máseleleri talqylanyp, osy jyly iske asyrý josparlanǵan jobalar qaraldy.

Oblystyq Ekonomıka jáne bıýdjettik josparlaý basqarmasy basshysynyń orynbasary Farhad Belbeevtiń aıtýynsha, basty mindet – áleýmettik-ınjenerlik ınfraqurylymdy damytý, aýyldyq jerlerde jaıly ómir súrýge jaǵdaı jasaý.

«Baǵdarlama sheńberinde biz aýyl turǵyndary eshqaıda ketkisi kelmeıtindeı jáne memlekettik qyzmetter, áleýmettik ıgilikter alýǵa, qala turǵyndarynan qalys qalmaıtyndaı, ózin-ózi damytýmen aınalysýǵa múmkindik bolatyndaı ómir súrý jaǵdaılaryn jasaýǵa tıispiz. Baǵdarlama aıasynda TÚKSh, áleýmettik-mádenı obektilerdi, kólik ınfraqurylymyn kúrdeli, ortasha jáne aǵymdaǵy jóndeýge qarajat bólinedi. Budan bólek, sý, gaz jáne elektrmen jabdyqtaý jelilerin salý jáne rekonstrýktsııalaý josparlanýda. Sport, mádenıet, bilim jáne densaýlyq saqtaý nysandaryn salý da kózdelgen», - dedi ol.

Ótken jyly «Aýyl – El besigi» baǵdarlamasy aıasynda 8 joba iske asyrylǵan. Bıyl 20 tirek aýylda 54 joba júzege aspaq. Onyń ishinde bilim berý salasynda – 13, densaýlyq saqtaý salasynda – 6, sport salasynda – 6, mádenıet salasynda – 6, jol jóndeý salasynda – 20. Jobalar Glýbokoe, Borodýlıha, Kókpekti, Kúrshim, Marqakól, Qaljyr, Úlken Naryn, Katonqaraǵaı, Soldatovo, Tuǵyl, Aqjar, Úrjar jáne basqa da aýyldarda júzege asyrylady. 2026 jyldyń sońyna deıin baǵdarlama sheńberinde memlekettik qoldaý sharalarymen barlyq 116 tirek aýyl qamtylady.

«Qalǵan aýyldar shetkeri qalmaıdy, olarǵa da memlekettik qoldaý sharalary kórsetiledi. Naqty aıtsaq, jumys istep turǵan kásiporyndardy damytý, usaq taýar óndirýshilerdi orta jáne iri aýyl sharýashylyǵy kásiporyndaryna biriktirý. Oblystyń qolaıly klımatyn eskeretin bolsaq, aýyl sharýashylyǵy salasyn damytý – bizdiń óńir úshin mańyzdy mindetterdiń biri», - dep túıindedi oblys ákiminiń aýyl sharýashylyǵy jónindegi orynbasary Erjan Nurbaev.