ShQO-da 101 oqýshy oblys ákiminiń syılyǵyn aldy
ÓSKEMEN. QazAqparat – Shyǵys Qazaqstan oblysynda 101 oqýshyǵa oblys ákiminiń atynan sertıfıkattar men syılyqtar tabys etildi, dep habarlaıdy QazAqparat tilshisi.
ShQO ákimi Danıal Ahmetov olımpıadalardyń, sporttyq jarystar men shyǵarmashylyq baıqaýlardyń jeńimpazdaryn Halyqaralyq balalardy qorǵaý kúnimen quttyqtady.
«Táýelsizdiktiń 30 jylynda elimiz talaı belesti baǵyndyrdy. Ár memlekettiń ózindik órkendeý tarıhy bar. Osy jyldar ishinde oblysta 107 densaýlyq saqtaý nysany, 144 mektep, 500-den astam sport nysany boı kóterdi. Elbasymyz básekege qabiletti memleket qurý týraly árkez aıtyp keldi. Ol úshin óskeleń urpaq bilimdi bolýy qajet», - dedi aımaq basshysy.
«DREAMFEST» halyqaralyq beıneleý jáne dekoratıvti-qoldanbaly óner baıqaýynyń Gran-prı ıegeri oblys ákimine óz sýretin syıǵa tartty.
«Bala kezimnen sýret salǵandy jaqsy kóremin. Sýretterim áý bastan úzdik dep tanylǵan joq. Biraq men saǵym synbaı, árdaıym sýret salýdy jalǵastyrdym. Mektepke túsken kezde muǵalimim meni sýret úıirmesine jazdy. Bul sheberlik pen shyǵarmashylyqtyń naǵyz ortasy. Óz jumystarymdy túrli baıqaýlarǵa jıi jiberip turamyn. Osy jyly týymdym Reseı, Polsha, Túrkııa sııaqty elderdiń úmitkerleri qatysqan «DREAMFEST» halyqaralyq baıqaýynda Gran-prıdi jeńip aldy», - dedi Semeı qalasyndaǵy №27 orta mekteptiń 9-synyp oqýshysy Ǵazıza Tanabek.
Kezdesý barysynda barlyq balalarǵa dıplomdar men noýtbýktar syıǵa tartyldy. Sonymen qatar merekege oraı qala jáne aýdan ákimderi 101 daryndy mektep oqýshysyna oblys ákiminiń atynan sertıfıkattar men syılyqtar tabys etti.
