ShQO-da 100 volonter aýyl oqýshylaryna onlaın bilim berdi
«Qazaqstan volonterler Alıansy» ZTB bastamasy boıynsha óńirdegi muǵalimder men stýdentterden quralǵan 100 volonter eldi mekenderdegi orta mektepterdiń 1 jýyq oqýshysyn oqytýǵa baǵyttalǵan «Birgemiz: Bilim» jobasyn ótkizdi.
Joba aıasynda 7 shilde-17 tamyz aralyǵynda óńirdiń aýyl oqýshylaryna arnalǵan IQ onlaın-lageri uıymdastyrylyp, onyń eki maýsymy ótti. Lagerge qatysý úshin ár aýdanda 10-20 oqýshydan jasaqtar quryldy.
«Jalpy, eki maýsymda IQ lagerinde 200-den astam bala bilim aldy. Oqýshylar úshin kún saıyn beınesabaqtar ótkizilip, túrli konkýrstar men olımpıadalar uıymdastyryldy. Arnaıy Birgemizbilim.kz saıty quryldy. Onda UBT-ǵa daıyndyq, aǵylshyn tili, quqyqtyq jáne kompıýterlik saýattylyq boıynsha qazaq jáne orys tilderinde 120-ǵa jýyq beınesabaq ornalastyryldy», - delingen ShQO Aqparat ortalyǵy taratqan habarlamada.
«Qazaqstan volonterleri alıansynyń» ókilderi atap ótkendeı, Birgemizbilim.kz bilim berý resýrsyn oblystaǵy barlyq muǵalimder men oqýshylar paıdalana alady.
Budan bólek, oqýshylardy oqýǵa yntalandyrý úshin olardy baǵaly syılyqtarmen marapattaý týraly sheshim qabyldanǵan. Jobanyń saraptaý komıssııasy belsendiligi zor 24 úzdik oqýshyny iriktep alyp, olarǵa noýtbýktar, planshetter jáne robototehnıka boıynsha qural-jabdyqtar tartý etti.
