ShQO-da 100 mlrd teńgeniń órt sóndirý tehnıkasy alynbaq
ÓSKEMEN. KAZINFORM — Shyǵys Qazaqstan oblysy 2025 jyly ormandardy órtten qorǵaýǵa qajetti tehnıkamen tolyq qamtylady.
Bıýdjetten tys tartylatyn qarjylandyrý kólemi 100 mlrd teńgeden asady. Onyń ishinde 60 mlrd teńge tehnıka satyp alýǵa, 28 mlrd teńge órtti erte anyqtaý júıesin engizýge baǵyttalady. Qalǵan 21 mlrd teńge orman tuqymbaqtaryn damytýǵa jumsalmaq. Bul týraly Ekologııa jáne tabıǵı resýrstar mınıstri Erlan Nysanbaev óńirge sapary barysynda aıtty.
— Bıyl ShQO orman sharýashylyǵynyń qajettilikteri úshin 47 avtotsısterna, 43 traktor jáne orman órtterin sóndirýge arnalǵan 34 mobıldi keshen satyp alý josparlanyp otyr. Tehnıka orman sharýashylyǵy mekemelerine lızıng arqyly beriledi. Al 2025 jyly oblystyń órtke qarsy qaýipsizdikke qajetti barlyq tehnıkamen qamtamasyz etilýi tolyq júzege asady, — dedi Erlan Nysanbaev.
Sonymen qatar saladaǵy kadrlyq áleýetti kúsheıtý jáne eńbek jaǵdaıyn jaqsartý sharalary qarastyrylyp jatyr. Mınıstr orman qyzmetteriniń tótenshe jaǵdaılarǵa daıyn bolýy men aýa raıynyń ystyq ári qurǵaq bolýyna baılanysty jedel áreket etýiniń mańyzdylyǵyn atap ótti.
Órt qaýpi joǵary maýsymǵa daıyndyq aıasynda orman sharýashylyqtarynyn janǵysh qaldyqtardan tazartý jumystary júrgizilip jatyr. Aǵash otyrǵyzý da bastaldy. Bıyl óńirde shamamen 16 mln túp aǵash otyrǵyzý kózdelgen.
Eske salsaq, osyǵan deıin Shyǵys Qazaqstanda eki kúnde ǵana 60-tan astam dala órti tirkelgeni habarlanǵan.