ShQO-da 100 qorap tiri shaıan áketip bara jatqan brakonerler ustaldy
Shyǵys Qazaqstan oblysynda bıyl 5 tonnaǵa jýyq balyq aýlaǵan brakonerler memleketke 31 mln teńge shyǵyn keltirdi, dep habarlaıdy Kazinform.
ShQO polıtsııa departamenti baspasóz qyzmetiniń málimetine súıensek, polıtseıler «Óskemen-Samar» tasjolynda «Gazel» júk kóligin toqtatqan.
Anyqtalǵandaı, 44 jáne 41 jastaǵy turǵyndar jalpy salmaǵy 1800 keli bolatyn 100 qorap tiri shaıandy tıisti qujatsyz tasymaldaǵan.
Osynyń saldarynan tabıǵatqa kelgen shyǵyn somasy 11 000 000 teńge boldy.
«Olar shaıandy Kúrshim aýdanynda belgisiz adamdardan satyp alyp, keıin Óskemen qalasynda satýdy josparlaǵan. Qazirgi ýaqytta QR QK-niń 335-baby 4-bóligine sáıkes sotqa deıingi tergeý júrip jatyr», - delingen aqparatta.
Osyǵan uqsas ekinshi fakti «Kúrshim-Úlken Naryn» tasjolynda tirkeldi.
Ulan aýdanynyń 44 jastaǵy turǵyny tizgindegen júk kóliginde 92 qapqa salynǵan jalpy salmaǵy bir tonnadan asatyn tiri shaıan tabylǵan.
Zalal somasy 7 700 000 teńgeden asyp otyr.
Shyǵys Qazaqstan oblysynda jyl basynan beri shaıandy zańsyz óndirý men tasymaldaýdyń 5 faktisi tirkeldi.
Al jalpy brakonerler bıyl 5 tonnaǵa jýyq balyq aýlap, 31 000 000 teńgeden astam shyǵyn keltirgen.
