ShQO-da 100 gektar dala men 350 tonnadan astam shóp órtendi
ÓSKEMEN. QazAqparat – Shyǵys Qazaqstan oblysy Kúrshim aýdanynda iri órt shyqty, dep habarlaıdy QazAqparat tilshisi.
Óńirdegi qurǵaq ári jeldi aýa raıy shóptiń órtenýin jıiletýde. Kóp jaǵdaıda buǵan sebep – turǵyndardyń otpen abaısyz áreket etýi. Zaısan, Jarma, Úrjar jáne Kúrshim aýdandaryndaǵy jergilikti bılik qyzyl jalynnyń ary qaraı taralýyna jol bermes úshin órt sóndirýshilerdiń kómegine júgingen.
«Eń iri órt Kúrshim aýdany Boran aýyldyq okrýginde tirkeldi. Kúshti jeldiń saldarynan tilsiz jaý tez arada sol mańaıǵa jaıylyp ketken. Otty aýyzdyqtaýǵa 20 órt sóndirýshi, 60 jergilikti turǵyn, 12 orman sharýashylyǵy mekemesiniń qyzmetkeri, 4 jergilikti atqarýshy organ ókili jáne 6 avtotsısterna jumyldyrylǵan», - dep habarlady ShQO TJD baspasóz qyzmeti.
Tek búgin tańǵa qaraı 100 gektar dala men 364 tonna shópti sharpyǵan órt óshirildi. Jalyn jaqyn mańdaǵy eldi mekenderge jetip úlgergen joq.
Aıta keteıik, ótken aptada ǵana oblysta 17 dala órti oryn alǵan bolatyn. Sonyń saldarynan 365 gektar dala órtengen.
