ShQO-da 100-den astam adamdy aldap soqqan alaıaqtar ustaldy
ShQO Polıtsııa departamenti baspasóz qyzmetiniń málimetine súıensek, tártip saqshylary bir jyl boıy ınternet arqyly alaıaqtyqpen aınalysqan qylmystyq toptyń jolyn kesti.
«Polıtsııa qyzmetkerleri Óskemende qylmystyq topty uıymdastyrýshyny ustady. Ol 28 jastaǵy qala turǵyny bolyp shyqty. Onyń 22 jáne 27 jastaǵy kómekshileri bolǵan. Kúdiktiler Instagram áleýmettik jelisinde akkaýnt ashyp, onda onlaın nesıe resimdeýge kómektesetindigi týraly habarlandyrýlar ornalastyrǵan. Sodan soń ózderine júgingen azamattardyń atynan mıkrokredıttik uıymdarda taýarlyq nesıeler resimdegen», - delingen aqparatta.
Qazirgi ýaqytta eldiń birneshe óńirinde jáne Shyǵys Qazaqstan oblysynda turatyn 109 jábirlenýshi anyqtalyp otyr. Kúdiktilerdiń turǵylyqty jerine tintý júrgizý barysynda 60-tan astam adam teńgerimin tolyqtyrǵan uıaly telefondar, túrli bankterdiń kartalary, uıaly baılanys operatorynyń Simply kartalary tárkilengen.
«Jedel-tergeý amaldary kezinde olardyń qylmys jasaý úshin 253 mobıldi qurylǵy men uıaly operatorlardyń 573 abonenttik nómirin paıdalanǵany anyqtaldy. Jábirlenýshilerge nesıe retinde resimdelgen teledıdar, planshet, uıaly telefondardy kúdiktiler Óskemen qalasynyń lombardtary men komıssııalyq dúkenderine tapsyrǵan. Polıtseıler ótkizilgen bul taýarlardyń jazbalary bar jýrnaldardy tapty. Krımınaldyq polıtsııa qyzmetkerleri osyndaı qylmystarǵa qatystylyǵyn anyqtaý maqsatynda basqa oblystarǵa baǵdar joldady», - delingen habarlamada.
Kúdiktilerge qatysty QR QQ-niń 190-baby 3-bóligi 4-tarmaǵy (Alaıaqtyq) boıynsha sotqa deıingi tergeý amaldary bastaldy.