ShQO-da 100-den astam adam qatty jel saldarynan dala órtin aýyzdyqtaı almaı jatyr
ShQO Tótenshe jaǵdaılar departamenti baspasóz qyzmetiniń málimetine súıensek, 14 maýsymda túnde Altaı aýdany Severnoe aýylynan 7 shaqyrym qashyqtyqtaǵy jetýi qıyn taýly jerden órt shyqqan. Tilsiz jaý shóp pen butalardy sharpydy. Saǵat 06:25-te 3 gektarǵa jaıylǵan ot óshirildi.
Alaıda saǵat 11.00 shamasynda Severnoe aýylynan 10 shaqyrymdaı jerde qaıtadan órt shyqty. Órtti óshirýge jetýi qıyn taýly jer men baǵytyn únemi ózgertetetin jyldamdyǵy sekýndyna 20 metrdeı qatty jel kedergi keltirip otyr.
«Qazirgi ýaqytta sol jerge oblystyq TJD qyzmetkerleri, ormanshylar jáne jergilikti atqarýshy organ ókilderinen 102 adam jáne 7 tehnıka jumyldyrylǵan. Jeke quramdy janý ornyna jetkizý úshin MI-8 AP tikushaǵy da tartyldy. Aldyn ala derek boıynsha órt aýmaǵy – 15 gektar. Eldi mekenderge qaýip tónip turǵan joq», - delingen aqparatta.