ShQO-da 100-den astam adam qarjy pıramıdasyna aqsha salyp, aldanyp qalǵan
SEMEI. QazAqparat – Shyǵys Qazaqstan oblysynda qarjy pıramıdasyn qurý kúdigimen 3 adamnyń ústinen qylmystyq is qozǵalǵan, dep habarlaıdy QazAqparat tilshisi.
ShQO boıynsha Ekonomıkalyq tergeý departamenti baspasóz qyzmetiniń málimetine súıensek, kúdiktiler WhatsApp messendjeri arqyly toptar quryp, turǵyndarǵa alǵashqy jarnaǵa aqsha quıý arqyly mol tabysqa kenelýge bolatyndyǵyn aıtyp, aldaǵan.
«Olar «100 myń teńge salsańyz, aqshańyzdy eki aıdyń ishinde 200 myń teńge qylyp qaıtaramyz» dep ýáde bergen. Qazirgi ýaqytta buǵan senip, shyǵynǵa batqan 113 jábirlenýshi anyqtalyp otyr. Qarjy pıramıdasynyń júıesi boıynsha alǵashqy bolyp kirgender ǵana paıyzdyq ústeme alǵan. Keıingilerdiń salǵan qarajaty múlde qaıtarylmady», - delingen habarlamada.
Osy rette, departament mamandary azamattarǵa qarjy pıramıdalarynyń qyzmetin júzege asyrǵany jáne jarnamalaǵany úshin qylmystyq jáne ákimshilik jaýapkershilik qarastyrylǵanyn eskertti.
«QR Qylmystyq kodeksiniń 217 babyna sáıkes osyndaı zańbuzýshylyq jasaǵandar 5 jyldan 10 jylǵa deıin bas bostandyǵynan aıyrylýy múmkin. Eger sizge qarjy pıramıdasynyń qyzmetine qatysty qandaı da bir aqparat belgili bolsa, departamenttiń 8 (7232)-29-56-51 senim telefonyna habarlasýyńdy suraımyz», - delingen vedomstvo aqparatynda.
