ShQO-da 10 jyl boıy izdeýde júrgen qylmysker Almatyda ustaldy
ÓSKEMEN. QazAqparat – Shyǵys Qazaqstan oblysynda polıtsııa qyzmetkerleri 10 jyl boıy izdeýde júrgen qylmyskerdi Almaty qalasynda ustady, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, 2011 jyly 4 adam Óskemendegi saýda úıleriniń birine shabýyl jasaǵan. Olar dúkennen 3,5 mln teńgesi bar seıfti urlap ketken. Atalǵan qylmysqa qatysqandardyń úsheýi ustalyp, sottaldy. Alaıda qaraqshylardyń biri osy ýaqytqa deıin bostandyqta júrgen.
«10 jyl ótkenine qaramastan krımınaldyq polıtsııa qyzmetkerleri kúdiktini izdestirý jumystaryn kúsheıtti. Nátıjesinde er adam Almaty qalasynda anyqtalyp, ustaldy», - dedi ShQO PD bastyǵy Saǵat Mádıev.
Qazirgi ýaqytta 44 jastaǵy azamat ýaqytsha ustaý ızolıatoryna qamaýǵa alynǵan. Aldaǵy ýaqytta ol Óskemen qalasyna jetkiziletin bolady.
Aıta keteıik, osy jyldyń birinshi toqsanynda tártip saqshylary izdeýde júrgen 46 qylmyskerdi qolǵa túsirdi.
