ShQO-da 10 tonnadan astam alkogol ónimin satpaq bolǵan top ustaldy
ÓSKEMEN. QazAqparat - Shyǵys Qazaqstannyń Úrjar aýdanynda zańsyz alkogol ónimin tıegen kólik qolǵa tústi, dep habarlaıdy QazAqparat tilshisi.
Oqıǵa 18 naýryz kúni bolǵan. Úrjar aýdandyq polıtsııa bóliminiń qyzmetkerleri 2000 danadan astam 5 lıtrlik torsyq tıegen kólikti toqtatady. Torsyqtaǵy suıyqtyq zańsyz jasalǵan alkogol ónimi ekeni anyqtalǵan. Tekserý barysyndaǵy 40 jastaǵy kólik júrgizýshisi men serigi taýardy aýdan halqyna satpaq bolǵandaryn moıyndaǵan.
«Kólik ıesi ákele jatqan júkke eshqandaı da qujat usyna almady. Osyǵan baılanysty ákimshilik is qozǵalyp, júk túgeldeı tárkilendi. Endi ol tolyqtaı saraptamadan ótedi. Oqıǵanyń ózge de jaı-japsaryn tergeý sharalary anyqtaıdy», - delingen oblystyq polıtsııa departamenti taratqan aqparatta.
