ShQO-da 10 kún buryn joǵalyp ketken balanyń denesi ózennen tabyldy
ÓSKEMEN. KAZINFORM – Shyǵys Qazaqstan oblysy Shemonaıha aýdanynda 10 kún buryn joǵalyp ketken 7 jasar balanyń denesi ózennen tabyldy.
ShQO Polıtsııa departamenti baspasóz qyzmetiniń málimetine súıensek, 7 jasar ul 23 shilde kúni saǵat 09.00 shamasynda úıinen serýendeýge shyǵyp, sol kúıi qaıtyp oralmaǵan. Polıtseıler, qutqarýshylar, áskerı qyzmetkerler men eriktiler izdestirý jumystaryna shuǵyl kirisken.
Kýágerler balanyń «Samal» saıabaǵynyń jaǵajaıyna shomylý úshin kelgenin kórgenin jetkizdi. Balanyń kıimderi men aıaq kıimderi jaǵadan tabylǵan. Sodan soń barlyǵy 100-ge jýyq adam balany jaǵalaý boıymen jáne qaıyqpen izdeýge kóshti.
«2 tamyzda Shemonaıha aýdany Barashkı aýylynyń mańyndaǵy Ertis ózeninen joǵalǵan balanyń denesi kózge kórinbeıtin dene jaraqatynsyz tabyldy. Qazirgi ýaqytta tergeý amaldary júrgizilip jatyr. Týystary men jaqyndarynyń qaıǵysyna ortaqtasyp, kóńil aıtamyz», - dep habarlady vedomstvo ókilderi.
