ShQO-da 10 dene shynyqtyrý-saýyqtyrý kesheni boı kóteredi
ÓSKEMEN. QazAqparat – Shyǵys Qazaqstan oblysynda 10 dene shynyqtyrý-saýyqtyrý kesheni salynbaq, dep habarlaıdy QazAqparat tilshisi.
ShQO Dene shynyqtyrý jáne sport basqarmasynyń basshysy Dosjan Ýalhanov onlaın formatta ótken baspasóz máslıhatynda byltyr óńirde sportpen aınalysqandar sany 427 myń adamǵa óskenin aıtty.
«Elimizdegi dene shynyqtyrý jáne sportty damytýdyń 2025 jylǵa deıingi tujyrymdamasyna sáıkes oblysta buqaralyq sportty damytý boıynsha birqatar jumys júrgizilýde. Sportty janyna serik etip, salaýatty ómir saltyn ustanǵan jandar úshin túrli sport nysandary salynyp jatyr. Búginde oblys boıynsha barlyǵy 3 myńnan astam sport kesheni bar», - dedi ol.
Ótken jyly 16 nysan paıdalanýǵa berilgen. Atap aıtqanda, Aqtoǵaı kentinde, Kókpekti aýylynda jáne Shar qalasynda úsh dene shynyqtyrý-saýyqtyrý kesheni boı kóterdi. Sondaı-aq eki júzý basseıni, bes sport alańy, bes shaǵyn fýtbol alańy jáne bir hokkeı qoraby salynǵan.
«Qazirgi tańda úsh sport nysanynyń qurylysy júrgizilýde. Bul Katonqaraǵaı aýyly men Shemonaıha qalasyndaǵy eki dene shynyqtyrý-saýyqtyrý kesheni jáne Maqanshy aýylyndaǵy bir sport modýli. Sonymen qatar bıyl Marqakól, Aqsýat, Qaınar, Borodýlıha, Samar, Bozanbaı, Úlken Naryn aýyldarynda jáne Serebrıansk qalasynda 10 dene shynyqtyrý-saýyqtyrý kesheniniń qurylysyn bastaý josparlanyp otyr», - dedi Dosjan Ýalhanov.
