ShQO-da 10 bilim berý mekemesi memlekettik attestattaýdan ótedi
Bıyldan bastap mektepter men balabaqshalar bilim berý standarttary talaptaryna sáıkestigin aıqyndaý úshin attestattaýdan ótedi. Bul jaıly onlaın formatta ótken brıfıng barysynda ShQO Bilim salasyndaǵy sapany qamtamasyz etý departamentiniń bilim sapasyn syrttaı baǵalaý bóliminiń basshysy Botagóz Raıymbekova málimdedi.
«Menshik nysanyna jáne vedomstvolyq baǵynystylyǵyna qaramastan barlyq mekemeler bes jylda bir ret attestattaýǵa jatady. Biz mektepke deıingi oqytý uıymdaryn, orta mektepterdi, tehnıkalyq jáne kásiptik bilim berý mekemelerin attestattaýdan ótkizemiz. Al joǵary oqý oryndardy QR Bilim jáne ǵylym salasyndaǵy sapany qamtamasyz etý komıteti attestattaıdy», - dedi ol.
Botagóz Raıymbekovanyń aıtýynsha, osy jyldyń ekinshi jartyjyldyǵynda Shyǵys Qazaqstandaǵy 10 bilim berý mekemesi, onyń ishinde tórt balabaqsha, bes mektep jáne bir kolledj memlekettik attestattaý rásiminen ótýi tıis. Attestattaý nátıjeleri boıynsha bilim berý uıymdaryna tıisti qorytyndy beriledi.